Mnr. Everhard Laing, wyksraadslid van die VF-Plus, het gesê die gemeenskap het gefrustreerd geraak met die slakkegang waarteen beskikbare erwe aan hulle toegestaan word en het besluit om reg in eie hande te neem.

Die twee stukke grond, van rondom 4 ha en 10 ha, vorm deel van die Landboukollege Potchefstroom, wat onder die beheer van die departement van landbou, grondhervorming en landelike ontwikkeling staan, en die plaaslike JB Marks-munisipaliteit. Laing sê die grond is nie geskik vir menslike nedersetting nie, want dit is turfagtige kleigrond wat gereeld onder water is.

grondbesetting
Lede van die Sarafina-nedersetting beraadslaag oor die uitmeet van erwe voordat daar met die oprigting begin word. Foto: Everhard Laing
grondbesetting
Lede van die Sarafina-nedersetting naby Potchefstroom het grond wat aan die Departement van Landbou, Grondhervorming en Landelike Ontwikkeling, asook aan die plaaslike munisipaliteit behoort beset. Foto: Everhard Laing
grondbesetting
Van die gemeenskapslede het reeds strukture begin oprig, maar daar word verwag dat hierdie strukture verwyder sal word nadat die JB Marks-munisipaliteit, sowel as die Departement van Landbou, Grondhervorming en Landelike Ontwikkeling klagtes van betreding by die Suid-Afrikaanse Polisiediens ingedien het. Foto: Everhard Laing
grondbesetting
Die grond is nie geskik vir menslike nedersetting nie, aangesien dit uit turfagtige kleigrond, wat gewoonlik onder water is, bestaan. Foto: Everhard Laing

Nadat die VF-Plus met die departement geskakel het, is ’n klag van betreding by die plaaslike polisiekantoor gelê. Laings sê die munisipaliteit sal na verwagting ook ’n klag lê nadat die aangeleentheid onder die aandag van mnr. Lebo Ralekgetho, munisipale bestuurder van die JB Marks-munisipaliteit, gebring is.

Laings sê hopelik sal daar dan binnekort ’n hofbevel uitgereik word om die onwettige besetters van die grond te verwyder. “Intussen bly ons in kontak met die polisie, terwyl die plaaslike VF-Plus LP, mnr. Fanie du Toit, van regeringsvlak af die ontwikkelinge sal monitor.

“Daar kan nie toegelaat word dat landboubedrywighede, wat ’n kern-komponent van die plaaslike ekonomie vorm, bedreig word deur roekelose en klaarblyklik polities gedrewe elemente binne die gemeenskap nie.”