Hy is vir R1,7 miljoen aan mnr. Jaco van der Walt van Waltkon-Borane by Mookgophong verkoop. Die vorige rekord was R1 miljoen wat mnr. Ockert Werner van Model-Borane ook op ’n nasionale veiling betaal het.

QT12-30 Tarzan word allerweë as een van die beste Boranbulle in Suid-Afrika beskou. Hy is reeds verlede jaar te koop aangebied, maar is onttrek nadat Meyer gemeen het die prys kon hoër gewees het. Vanjaar het Tarzan egter loshande die hoogste prys nóg vir ’n Boranbul behaal.

Mnr. André Pieterse, besturende direkteur van Vleissentraal Bethlehem, sê die teeldierbedryf beleef tans ’n opbloeitydperk vanweë die kuddeheropboufase waardeur Suid-Afrikaanse veeboere beweeg.

“Die afgelope paar jaar se groot droogtes het daartoe gelei dat boere van hul teeldiere moes verkoop of selfs laat slag. Met die beter reënval wat boere in die somerreëngebiede vanjaar gehad het, is boere besig om kuddes te herbou, wat die vraag na goeie manlike en vroulike diere laat styg. ’n Beter mielieproduksiejaarseisoen en beter pryse dra ook daartoe by omdat die meeste graanboere ook ’n veevertakking het waarin hulle belê.”