Boere en lede van die publiek word versoek om uiters versigtig te wees met enige aktiwiteite wat veldbrande kan veroorsaak, veral tydens winderige toestande.

Die waarskuwing volg nadat ’n hewige veldbrand verlede naweek meer as 70 000 ha in die omgewing van Boshof afgebrand het. Volgens aanvanklike ondersoeke is die brand veroorsaak deur ’n braaivuur by ’n piekniekplek langs die R64 wat buite beheer geraak het. 

Brandtyd nog nie op ’n einde

Mnr. Johann Breytenbach, hoofbestuurder van die Vrystaatse sambreel-organisasie vir brandverenigings, sê weens die droë toestande is die brandtyd in groot dele van die provinsie nog nie verby nie. “Die reën wat op Donderdagaand 11 Januarie oor dele van die provinsie voorgekom het, was baie kol-kol. Op plekke is tot 40 mm gemeet, terwyl by Dewetsdorp slegs ’n paar druppels geval het.

“Die weerstoestande maak dit baie waarskynlik dat gebiede wat die afgelope maand ’n lae of geen brandrisiko gehad het, weer ’n tydperk van hoë brandgevaar kan ervaar. Wees asseblief versigtig en slaan ag op die brandwaarskuwings en heersende weerstoestande,” sê Breytenbach.

Boere word gevra om ook paraat te wees tydens weerstoestande waar weerlig met min reën kan voorkom, aangesien die weerlig die veld maklik aan die brand kan steek.

Risiko’s

Van die risiko’s wat die vereniging al aan boere en lede van die publiek deurgegee het, sluit in om nie sigaretstompies by voertuie uit te gooi nie, want dit kan die gras langs paaie aan die brand steek. Oop vure moet sover moontlik beperk word, veral op winderige dae. 

Verder word boere gevra om enige probleme met kragdrade betyds aan te meld sodat moontlike kortsluitings en gevolglike brande voorkom kan word. Bome of takke wat rondom kragdrade voorkom, kan ook brande veroorsaak. Dit moet verwyder word. 

Boere moet instandhoudingswerk in die veld op warm en winderige dae liefs tot ’n minimum beperk aangesien vonke van werk met elektriese toestelle die veld aan die brand kan steek. Verder is dit belangrik dat ’n gebied waar ’n brand voorgekom het, vir 12 uur daarna steeds gemonitor moet word, want boomstompe kan nog lank smeul en weer vlam vat as winderige toestande voorkom.