’n Verwoestende veldbrand het op 28 Desember 2016 in die Calvinia-omgewing ontstaan en het baie vinnig versprei weens droë en winderige toestande. “Binne ’n week het 16 plase gedeeltelik of geheel en al afgebrand. Die skatting tans is dat 25 000 ha in die slag gebly het,” sê mnr. Andre Steenkamp, wie se broer in die distrik boer.

“As gevolg van die knellende droogte moes boere reeds hul kuddes voer en was voervoorrade reeds laag. Nou moet boere noodgedwonge 6 000 skape voer wie se weiveld in die brand verwoes is. Al wat van eens goeie weiveld oorgebly het, is as en klippe,” voeg hy by.

Die boere wat skade gelei het benodig sowat 200 ton voer per maand om hul kuddes te voer. Medeboere van Middelburg in Mpumalanga het 150 ronde grasbale geskenk om hul eweknieë in Calvinia by te staan, maar vervoer is tans ’n uitdaging.

Steenkamp wil sy medeboere bystaan deur vervoer vir die skenking te reël en doen ’n beroep op enige Suid-Afrikaners wat kan help om met hom in kontak te tree op 082 520 8665.

“Ek wil graag soveel moontlik mense bereik en soveel moontlik hulp te kry vir die boere. Die effek van die droogte is duidelik sigbaar maar die effek van die brand en droogte gaan vernietigend wees vir die boere, gemeenskap en provinsie,” sê hy.