‘n Skerp daling in voedselinflasie het die verbruikersprysindeks (VPI) in April tot 4,8% laat daal.

Luidens ‘n verklaring van die Nasionale Landboubemarkingsraad (NLBR) dui Statistieke SA se jongste inflasiesyfers aan dat voedselinflasie op ‘n maand-tot-maand basis met 0,4% gedaal het. Volgends die statistiek het voedselpryse op ‘n jaar-op-jaar basis met 0,9% gestyg.

Die NLBR sê die plaaslike pryse van koring en wit en geel mielies daal steeds, terwyl die prys van sonneblomsaad en die melkprodusenteprys vir die tydperk April 2009 tot April 2010 gestyg het.

Suiker, lekkergoed, nageregte en vrugte het die grootste prysverhogings aangeteken in dig bewoonde gebiede, terwyl koffie en tee die meeste in landelike gebiede gestyg het. Verwerkte voedselprodukte het ‘n jaar-op-jaar prysverhoging van 2,2% aangeteken, terwyl pryse van onverwerkte produkte vir dieselfde tydperk met 1,5% gedaal het.


Hoofrede agter die daling

Dr. John Purchase, die hoof-uitvoerende beampte van die Landboubesigheidskamer (LBK), sê die hoofrede agter dié daling is die feit dat kommoditeitspryse van landbouprodukte plaaslik en internasionaal tans laag is. “As gevolg van ‘n hoë wêreldaanbod wat voedselprodukte betref, is kommoditeitspryse tans laag,” verduidelik hy.

Purchase sê die daling is derhalwe nie noodwendig goeie nuus vir boere nie: “Die verbruiker se voordeel hier is dus die boer se nadeel, want pryse aan boere is tans onder baie druk.”

Purchase sê dit is wel interessant dat die VPI nie gestyg het weens hoër brandstofpryse en kragtariewe wat sedert April van krag is nie.

Vooruitsigte vir komende maande

Purchase meen dat voedselinflasie en kommoditeitspryse vir ‘n paar maande op dieselfde vlakke sal beweeg. “My mening is dat voorraadvlakke hoog gaan bly, wat druk op kommoditeitspryse gaan veroorsaak. Die VPI sal dus in toom gehou kan word. Ek is wel bekommerd oor die invloed van kragtariewe en arbeidskosts, veral die laasgenoemde omdat dit eersdaags weer tyd is vir onderhandelinge oor loonverhogings.”

Volgens Purchase sal die rand die sterk posisie wat dit tans teen die dollar en die euro het, vir ‘n paar maande behou, en dit sal ook ‘n gunstige invloed op inflasie hê.

Lees die NLBR se verslag in PDF-formaat hieronder.

28 Mei 2010