Daar is raad wanneer dit tyd is om af te tree en jou spaargeld is onvoldoende. Hier is ’n paar wenke om te oorweeg.

Aanvaar dit en maak ’n plan. Hoe vinniger jy dit aanvaar, hoe beter. Dan kan jy veranderinge aan jou leefstyl maak om aan te pas by dit wat jy het. Nou is die tyd om ’n finansiële adviseur se hulp te vra oor hoe jy jou beleggings kan herstruktureer.

Heroorweeg jou aftreedatum. Baie maatskappye bied kontrakte aan sodat mense kan aanhou werk ná die ooreengekome of verpligte aftreedatum. Oorweeg dié opsie ernstig. Sommige maatskappye laat mense toe om vir langer as die “tradisionele” aftree-ouderdom van 65 te werk.

Maak seker wat jou inkomste gaan wees. Dit is belangrik om te weet wat jou opbrengste uit jou aftrede-beleggings gaan wees sonder dat die kapitaal te vinnig afneem. Hou in gedagte dat inkomstebelasting van jou maandelikse salaris verhaal sal word voordat dit in jou rekening is. Sodra jy weet hoeveel jy nodig het, is dit tyd om te besluit watter items in jou maandelikse begroting noodsaaklik is en watter is luukses.

Heroorweeg jou eiendom. Dit is onwaarskynlik dat jy ’n groot huis gaan nodig hê wanneer jy aftree. Dit is nie die moeite werd om ’n groter woning te behou en voort te gaan met die instandhouding daarvan (en betaling daarvoor) vir ’n jaarlikse besoek van jou kinders nie.

Herstruktureer jou vooraftrede-besparingsplan. As jy voor aftrede spaar, maar skuld het wat ná aftrede nog nie afgelos gaan wees nie, werk daaraan om die skuld so vinnig as moontlik af te betaal. Sodra die skuld afgelos is, kan belastingdoeltreffende spaar vir aftrede hervat word.

Ondersoek bykomende bronne van inkomste ná aftrede. As jy kragtens jou werkgewer se regulasies móét aftree, kyk na ander opsies waaruit jy ’n inkomste kan verdien. Byvoorbeeld, as jy ’n onderwyser was, bied ekstra klasse aan.

’n Belangrike aspek om te oorweeg, is die feit dat jou inkomstevereistes tydens aftrede sal verander. In baie gevalle vereis die eerste vyf tot tien jaar van aftrede meer geld, omdat afgetredenes tyd en geld op vakansie bestee. Dié begeerte vervaag later en besteding konsentreer dan op huislewe en aktiwiteite in die omgewing waar mense woon. Wees gereed vir stygings in mediese uitgawes, nie net bydraes tot ’n mediese fonds nie, maar ook direkte besteding aan mediese behandeling.

Dit is belangrik om so gou as moontlik met ’n finansiële adviseur te gesels sodra jy besef dat jou aftreeplan aangepas moet word. Baie mense oorskat die inkomste wat hulle uit beleggings gaan verdien wanneer hulle nie meer werk nie; ’n kwessie wat ’n adviseur in besonderhede kan toelig.

Lees meer oor ’n plan vir jou aftrede: Beplan jou aftrede.

Me. Suzean Haumann is ’n gesertifiseerde finansiële beplanner® en hoof van Brenthurst Wealth Tygervallei.