Gee my krag. Dis deesdae elke Suid-Afrikaner se kreet met die groeiende beurtkrag in die land. Soos mense in die donker nie kan kos maak, TV kyk, klere was of selfs by die werk actually kan werk nie, word almal gedwing om leefstylaanpassings te maak en na ander opsies te kyk wat bietjie verligting kan bring.
Sam Berrow van Solar Advice wat verbruikers help met alternatiewe kragopsies, sê hulle sien ’n dramatiese toename in mense wat hul eie planne vir krag maak.
“Ek is self ’n ma. Ek moes huis toe jaag van die werk af om kos vir my kind te maak, en erger: Om nie warm water vir babaformule te hê nie. Gesinne en besighede is desperaat om hul normale lewens te hervat en draai na sonkrag. Ons hoor daagliks die frustrasie en desperasie in ons kliënte se stemme en nou selfs nog meer.”
