Die komediant Trevor Noah ontvang vanjaar die Erasmus-prys van Nederland danksy sy skerp, skertsende en inklusiewe politieke kommentaar.
Dit is maar die tweede keer in die geskiedenis dat ’n komediant hierdie prys van die Nederlandse regering ontvang. Noah se bekroning volg 65 jaar nadat die Amerikaanse komediant Charlie Chaplin dit ontvang het. Chaplin word onder meer onthou vir sy prent The Great Dictator, waarin hy Adolf Hitler aanvat. Die verering behels ’n kontantprys van nagenoeg R3 miljoen (€150 000).
Die prys word jaarliks toegeken aan ’n persoon of instansie wat ’n buitengewone bydrae lewer tot die geesteswetenskappe, die sosiale wetenskappe of die kunste in Europa en elders. Koning Willem-Alexander is die beskermheer van die prys.
