Dit is amper te moeilik om te glo dat die eiesoortige en lag-met-’n-traan-stuk My hart is ’n muurbal (en ander los gedagtes) gebore is uit ’n tekort en om ’n plan te beraam.
Geen werkgeleenthede vir die twee belowende akteurs Wian Taljaard en Wynand Kotze in die pandemietyd en ook daarna het hulle genoop om werk vir hulself te skep. En siedaar, hul teaterjuweel is nou op die planke.
Die twee speel nie net daarin nie, hulle vervaardig dit ook. Hulle is ook aan die stuur van ’n Afrikaanse vertaling en verwerking van die Britse dramaturg Mike Bartlett se Bull (deur Nico Scheepers), wat as Bul in April op die Klein Karoo Nasionale Kunstefees (KKNK) debuteer.
