Die eenmanstuk Shadow Boxing word van Woensdag tot 21 Mei om 19:00 in die Baxter Masambe-teater in Rondebosch, Kaapstad, opgevoer.
Dié stuk, wat handel oor deurgangsrituele en die ontwikkeling van ’n eie identiteit, het vroeër vanjaar op die Klein Karoo Nasionale Kunstefees gedebuteer en gunstige resensies ontvang.
Flynn (Daniel Newton) is ’n jong bokser en die seun van ’n beroepsbokser wie se loopbaan nooit werklik vlamgevat het nie. Tog beoog Flynn om ’n suksesvolle beroepsbokser te word. Om dit te kan doen, moet hy egter sy oorgeërfde opvattings oor manlikheid laat vaar en sy eie identiteit uitbeitel, en hy begin met ’n uitmergelende oefenprogram om sy interne stryd teë te werk.
