Daar het onder kosfoendi’s ’n stigma gekleef aan die gebruik van blikkies en pakkies in resepte. Dus het al die resepteboeke en resepte vir jare die mense aangemoedig om vars bestanddele te gebruik – daar was min pakkies en blikkies as bestanddele gelys. Ek moet erken ek was een van daardie neus-optrek-snobs, maar ek het oor die jare my siening heeltemal verander en is nou ’n groot voorstander van spensbestanddele.
Marinda Engelbrecht skryf in haar nuwe kookboek: “Die gehalte van die inhoud van hedendaagse blikkies en pakkies voldoen aan geweldig hoë standaarde. Maak gebruik daarvan. Menige blikkie en pakkie is al vinnig uitgeruk as onverwagte gaste opdaag. En hier dink ek veral aan die getroue blikkie tuna. Moet ook nie bokswyn onderskat nie. As jy skamerig trek vir bokswyn, gooi dit uit in ’n kraffie.” Give this girl a Bells!
In die kookboek neem Marinda doodgewone blikkies en pakkies en tower spoggerige disse op, wat met die grootste selfvertroue aan familie en vriende voorgesit kan word. Só maak sy heerlike hoenderpastei, varkschnitzel, Oumabeskuit-poeding, aspersiesop en vele ander heerlike en maklike geregte.
