Ek weet nie waarvoor ek myself die afgelope tyd die meeste vererg het nie – Eskom of kospryse, maar dit is besig om my gemoed bitterlik bedonderd te maak. Nie net sit ons sonder krag nie, maar ons het nog onlangs vir ses liter boksmelk R89,99 betaal en nou is dit binne omtrent twee maande R110. Dan praat ek nie eens van vleis en ander kruideniersware nie. Ek en my Ier gebruik al hoe meer stapelvoedsel soos rys, pasta en aartappels om ons rande te rek.
Ek het net 500 g beesvleis gebruik om dié lekker kerrie vir ses te maak. Kyk en het my vriende nou gesmul! Bedien dit saam met knoffelbotter-gesmeerde wraps, poppadoms, basmatirys (of enige rys van jou keuse), tamatie-en-uie-salsa, opgesnyde piesang en blatjang. Met die byvoeging van aartappels het jy min vleis nodig vir dié geurige kerriefees vir ses.
McDonald’s se hash browns is my dood – ek bestel altyd twee met ’n koffie en dit eet ek in die kar op pad werk toe. Dié Amerikaanse gebraaide aartappelkoekie se naam kom van “hashed browned potatoes”. Hashed hier beteken fyngekap en browned beteken bruin gebraai. Die Switsers het weer die rösti wat van gerasperde aartappel en geurmiddels gemaak word.
