In sy vorige lewe is daar graag oor die rok van die Amarok gegrinnik. Maar nou, in sy tweede generasie, het Volkswagen se Amarok-bakkie die nodige grom in sy bene om die mark behoorlik mee storm te loop.
VW se nuwe Ford Ranger-gebaseerde Amarok word op 18 Maart in sy dubbelkajuit-formaat plaaslik bekend gestel – en ons is seker die handelaars kan nie meer wag nie. Die nuwe bakkie lyk nie net treffend nie, sy nuwe stel diesel-enjins beloof hardebaard-verrigting in dié mededingende mark.
Die eerste Amarok is in 2010 in Argentinië bekend gestel (waar hy ook gebou is), met die groep se klein 2.0-liter-biturbodiesel wat destyds die groot nuus was. Met sy lae verbruik en goeie 400 Nm-wringkrag was dit ’n klasleidende stukkie ingenieurswerk, maar straks sy tyd vooruit.
