Suid-Afrika spog met indrukwekkende riviere . . . Almal ken die majestueuse, amper 2 500 km lange “Grootrivier”, oftewel die Oranje of Gariep, wat vanuit Lesotho tot in die Atlantiese Oseaan kronkel. En verder noord is daar natuurlik die Vaal-, Limpopo- en Thukela-, met die Vis-, Breede- en Bergrivier onder in die Ou Kolonie.
Een van die minder bekendes is die Olifants, maar hy hoef glad nie vir die grotes terug te staan nie. Dié rivier ontstaan bo in die ruwe Winterhoekberge, vanwaar dit deur die Cederberge en Namakwa-bossieveld vloei op pad Weskus toe.
Teen ’n skamele 285 km is die Olifants ’n pikkie teen van die Kaap se ander riviere, maar in die laaste dekade het dit een van my gunstelingwaterweë geword. Bo in die bergland skuim hy bombasties oor rotse en watervalle, maar raak dan rustig verby Clanwilliam en die Bulshoekdam, seker een van Suid-Afrika se mooiste opgaardamme.
