Die voormalige netbal-skeidsregterbaas Annie Kloppers moet eerder voor haar eie deur vee as om vingers te wys oor hoekom sy haar nou in die spreekwoordelike netbal-woestyn bevind, sê die president van Netbal Suid-Afrika (NSA), Cecilia Molokwane.
“Toe Annie verlede jaar daardie brief geskryf het waarin sy sê sy wil niks met NSA te doen hê nie en net by Wêreldnetbal se toernooie werk, het ons daarna gekyk en gesê hoe kan hierdie vrou wil blink in die buiteland, maar nie werk in die land wat haar soveel geleenthede gegee het nie,” het ’n vurige Molokwane gister aan Rapport gesê.
“Jy kan nie ’n lid van Wêreldnetbal wees as jy nie ’n lid is van NSA, wat op goeie voet met die organisasie is, nie, so sy kon nie net besluit sy wil NSA die rug keer en net vir Wêreldnetbal werk nie.
