’n Storieaand met vertellings oor die opleiding van Suid-Afrikaanse Spesiale Magte-operateurs (recces) en hul suksesvolste geheime sabotasie-sending in die Angolese bosoorlog word Vrydagaand 24 Maart in Bloemfontein gehou.
Die Bloemfonteiner Johan Raath, ’n oud-recce en later ’n private militêre kontrakteur oor die wêreld heen, gaan in diepte oor recce-keuring en -opleiding gesels. Raath se jongste boek, A Breed Apart – The Inside Story of a Recce's Special Forces Training Year, het onlangs verskyn.
Jack Greeff, ’n boorling van Vrede en een van die mees vereerde soldate en spesiale-magte-operateurs van die ou Suid-Afrikaanse Nasionale Weermag (SANW), gaan die storie van 1 en 4 Verkenningskommando se uiters geheime Operasie Amazon in 1980 aan die weskus van Afrika vertel.
