’n Hospitaal met 200 beddens en vier goed toegeruste teaters in ’n arm deel van die Oos-Rand is op die punt om te sluit omdat die Padongelukfonds (POF), ondanks verskeie hofbevele, nie hul rekeninge betaal nie.
Die hospitaalbestuur neem sedert Desember geen nuwe pasiënte in nie. Die afgelope week was daar net vier pasiënte oor, die sale en die noodafdeling was leeg en die teaters donker.
Die Sunshine-hospitaal in Actonville, Benoni, behandel uitsluitlik slagoffers van padongelukke wat geen ander heenkome het nie. Dié mense is te arm om private mediese dienste te bekostig en staatshospitale kan hulle nie help nie, sê Ken Ford, besturende direkteur en mede-eienaar van die hospitaal.
