’n 51-jarige man is tot 30 maande tronkstraf gevonnis nadat hy skuldig bevind is aan dieremishandeling op die Brandfort Pigs Construction-plaas wat deur die Vrystaatse regering befonds is. Die vonnis is opgeskort vir vier jaar.
Victor Nchepe is die enigste van vyf beskuldigdes, wat almal belanghebbendes by ’n varkplaas in Brandfort in die Vrystaat was, wat skuldig bevind en gevonnis is vir die mishandeling van die diere.
Keshvi Nair, woordvoerder van die Nasionale Raad van Dierebeskermingsverenigings (NDBV), sê hulle het al in 2016 klagtes ontvang oor varke wat afgeskeep en mishandel word op die plaas. Volgens hul kennis is die plaas destyds deur die staat befonds.
