As Suid-Afrika ’n oplossing wil hê vir geslagsgeweld, gaan ernstig met mans gepraat moet word. Die oplossing lê by mans, want hulle “is siek”.
Bheki Cele, minister van polisie, het dit Woensdagaand gesê toe hy die gedenkdiens van die vermoorde Cleo Diko van Mitchells Plain bygewoon het.
Haar lyk is op 27 Januarie vanjaar onder die vloer van ’n buitekamer van die verdagte se ma se huis in Mitchells Plain gevind. Diko is op 14 Oktober verlede jaar laas gesien, maar is eers op 26 Januarie as vermis aangemeld. Haar ouderdom is aanvanklik as 25 aangegee, maar sy was ten tyde van haar dood 34 jaar oud.
