Bheki Cele, minister van polisie, het Dinsdag “spesiale taakspanne” in Westbury, Johannesburg, ontplooi weens die toename in bendegeweld. Hulle sal die gebied vir drie maande patrolleer.
Daar was die laaste tyd ’n reeks skietvoorvalle in Westbury wat vermoedelik met bendegeweld verband hou. In die laaste naweek van Februarie is 13 mense in skietvoorvalle gewond.
Cele en ’n afvaardiging wat Panyaza Lesufi, Gautengse premier, en Thapelo Amad, uitvoerende burgemeester van Johannesburg, ingesluit het, het Dinsdag ’n imbizo oor misdaadbekamping in Westbury bygewoon. Die imbizo was gemik op gemeenskappe wat deur die Sophiatown-polisiekantoor bedien word.
