Talle woonbuurte in Gqeberha kan binne die volgende paar dae wateronderbrekings ervaar as die hele Nelson Mandelabaai-metro se waterverbruik nie daadwerklik verminder word nie.
Die metro kan voortaan slegs 31 megaliter water per dag uit sy opgaardamme onttrek. Voorheen is tot 100 megaliter per dag onttrek weens die hoë vraag.
Retief Odendaal, burgemeester, het op sy Facebook-blad aangekondig dat die metro nou heelwat minder water uit die opgaardamme sal onttrek. Dit beteken minstens 19 woonbuurte, wat vernaamlik staatmaak op watertoevoer uit die damme, onderbrekings kan ervaar as die waterverbruik oor die metro heen hoog bly.
