'Rioolbom’: Paar eindelik vir skade vergoed

’n Skadevergoedingseis van Johnny (60) en Elize Baldock (59) van Bloemfontein nadat ’n “rioolbom” hulle getref het, is ná meer as twee en ’n half jaar buite die hof geskik.

Hul lewe is omvergewerp toe ’n rioolverteertenk van die Mangaung-metro by die Bloemspruit-rioolvuilaanleg ontplof het.

’n Dik stroom rioolvuil wat in die tenk was om “te verteer” het hulle meegesleur. Megaliters rioolvuil het uit die tenk gespuit. Hul motor, ’n Ford Ka, is so erg beskadig dat dit afgeskryf moes word.