Die DA het vir Panyaza Lesufi, Gautengse premier, gewaarsku om enige planne om die Tshwane-metromunisipaliteit onder administrasie te plaas, te laat staan, omdat hy self bygedra het tot die “vernederende” politieke onstabiliteit in die hoofstad.
Die waarskuwing volg aan die einde van ’n dramatiese week waarin die stad se aangewese burgemeester, die Cope-lid Murunwa Makwarela, drie weke nadat hy verkies is, in skande moes bedank. Makwarela is uitgevang – nie net dat hy gelieg het oor sy bankrotskap nie – maar ook dat hy hofdokumente vervals het wat kwansuis sou bewys hy is ná sekwestrasie gerehabiliteer.
In ’n bisarre paar dae is Makwarela Dinsdag as burgemeester afgedank, Donderdag heraangestel net om Vrydag wéér te bedank.
