Pres. Cyril Ramaphosa is weer in die visier van opposisiepartye weens hernude vrae oor of die Amerikaanse dollars wat op sy Phala Phala-wildplaas versteek is, wel die land wettig binnegekom het.
Dit volg nadat die DA Maandag onthul het die Suid-Afrikaanse Inkomstediens (SAID) kon geen rekord vind dat die Dubaise sakeman Hazim Mustafa die $580 000 verklaar het met sy aankoms in die land voordat hy dit gebruik het om buffels op Ramaphosa se wildplaas te koop nie.
Die SAID het die inligting aan die DA verskaf nadat John Steenhuisen, DA-leier, op 7 Desember ’n aansoek ingevolge die Wet op die Bevordering van Toegang tot Inligting (Paia) daarvoor ingedien het.
