Die invloed van twee ministers wat in Desember ’n belangrike rol gespeel het om pres. Cyril Ramaphosa te oorreed om nie te bedank nie, is stil-stil ingekort met die kabinetskommeling.
Ramaphosa wou vroeg in Desember bedank weens druk oor die diefstal op sy Phala Phala-wildplaas, maar Gwede Mantashe, minister van minerale bronne en energie, en Mondli Gungubele, pas aangestel as minister van kommunikasie en digitale tegnologie, het hom in die openbaar verdedig én hom agter die skerms omgepraat om te bly.
Hoewel Mantashe steeds minister van minerale bronne en energie is ná Ramaphosa se kabinetskommeling, blyk dit nou dat die koördinering van energie-opwekkingsprojekte voortaan aan Ebrahim Patel toevertrou is.
