Die parlement se staande komitee vir openbare rekeninge (Skoor) het Woensdag besluit om André de Ruyter, voormalige uitvoerende hoof van Eskom, te nooi om voor hom te verskyn vanweë sy opspraakwekkende beweringe oor korrupsie by die kragverskaffer.
Skoor het ook voorlopig besluit om met ’n formele ondersoek na Eskom te begin met die finale besonderhede hieroor wat na verwagting volgende Woensdag uitgestryk sal word. De Ruyter se verskyning sal dalk die eerste stap in dié beoogde ondersoek wees.
Dit volg nadat Bheki Hadebe, ANC-LP, Woensdag in ’n fisieke sitting ’n petisie voorgelê het dat Skoor De Ruyter moet nooi rakende sy beweringe in ’n onlangse televisieonderhoud.
