Mxolisi Dukwana, nuwe Vrystaatse premier, het ’n waterspesialis-taakspan op die been gebring om ’n watersekerheidstrategie op te stel.
’n Waterdiens-infrastruktuurtoelae van R125,9 miljoen is bekom en boonop het die departement van water en sanitasie bykomend R9,7 miljoen aan Bloemwater gegee vir dringende diensleweringsingryping. Dit is benewens die geld wat provinsies en munisipaliteite vir waterlewering kry, het Gadija Brown, Vrystaatse LUR vir finansies, Donderdag in Gariep in haar begrotingsrede gesê.
Brown het ’n begroting van R41,8 miljard vir die 2023-’24-boekjaar vir die Vrystaat ter tafel gelê. Dit is ’n rapsie minder as die aansuiweringsbegroting van die 2022-’23-boekjaar van R42,1 miljard.
