Die organisasie wat die groot drankmaatskappye in die land verteenwoordig, is bekommerd daaroor dat Suid-Afrika een van die min lande in die wêreld is wat nog ’n verbod op die verkoop van drank tydens ’n inperking vir Covid-19 het.
Die Suid-Afrikaanse Drankeienaarsvereniging (Salba) sê meer ontwikkelende lande het nou die aanvanklike benadering tot ’n verbod laat vaar.
Indië het Maandag sy verbod op die verkope van alkohol en tabakprodukte opgehef en laat dit toe in alleenstaande winkels, maar nie in winkelsentrums nie, berig die Hindustan Times. Die drankwinkels moet ook gehoor gee aan streng maatstawwe ten opsigte van die fisieke afstand wat klante van mekaar moet handhaaf en hoeveel mense op een slag in ’n winkel toegelaat word.
