Gholf het oor die jare heen vir talle vreemde voorvalle gesorg, maar wat in die laaste ronde van die Nieu-Seelandse Ope met die Australiër Shae Wools-Cobb gebeur het, is ongekend.
Wools-Cobb, op 17 onder baansyfer én die voorloper ná die derde dag se spel, het uiteindelik gesamentlik in die 26ste plek geëindig nadat hy sy laaste rampspoedige ronde in 78 houe voltooi het.
Dit was eenvoudig nooit die Aussie se dag gewees nie, soos bewys deur ’n ongelooflike vreemde voorval waarin Wools-Cobb per ongeluk twee balle met dieselfde hou raakgeslaan het in ’n poging om hom uit die ruveld uit te speel.
