Die beleërde Leeus het vooraf gesê hulle gaan vir mekáár speel en dít is presies wat hulle Saterdagmiddag op Ellispark in Johannesburg teen die Glasgow Warriors gedoen het.
Hulle het as trop saamgestaan en die Skotse span in die twee spanne se wedstryd in die Verenigde Rugbykampioenskap (VRK) met 35-24 geklop.
Die Leeus, wat tot dusver ’n nagmerrie-seisoen beleef en boonop die afgelope week baie drama van die veld af gehad het, het veral in die eerste helfte hard gebrul en rustyd met 27-14 voorgeloop.
