Hambidge: Geestelik en Christelik is nie dieselfde

akkreditasie

Sy voel mislei deur die samesteller en uitgewer van 'n Christelike digbundel, aangesien sy haarself beslis nie as ’n Christelike digter beskou nie, skryf Joan Hambidge.

Joan Hambidge.

Op Saterdagaand lees ek op Versindaba dat Die mooiste Afrikaanse Christelike gedigte (Lux Verbi) deur Cas Vos saamgestel is. Boonop word my van as “Hambridge” aangegee en die webpamflet weet te vertelle dat daar ook nuwe verse spesiaal vir die nuwe bloemlesing geskryf is.

Maar benewens die rare naamvergissing (wat die uitgewer wel regstel op die advertensiebiljet na ’n foonoproep, is die eintlike kwessie dat ek vir die eerste keer van die bloemlesing te hore kom op Versindaba. In al die 30 jaar plus wat ek by NB publiseer, was daar nog altyd die hoflikheidsgebaar om toestemming te vra. Die kontrak bepaal dat die uitgewer tekste sonder toestemming mag oordruk en Lux Verbi is deel van NB.)

Vir Die mooiste Afrikaanse liefdesgedigte met Fanie Olivier as samesteller, was daar ’n brief. Vir skoolboeke altyd ’n e-pos. En wanneer kleiner uitgewers my nader, veral vir skoolboeke, gee ek graag toestemming. Sonder betaling.

Daar is, soos ons weet, ’n groot verskil tussen Christelik en geestelik.

Soos my vriend Werner altoos meen: “There is no money in poetry and no poetry in money”.

Lux Verbi se terugkrabbeling dat digters betaal sal word, is dus nie my hoofbeswaar nie.

’n Digter bestuur sy of haar werk. Jy het – volgens my – die reg om te weet dat jou gedigte “gebruik” gaan word. ’n Gedig binne bundelverband het ’n ander betekenis as wanneer dit opgeneem word in ’n Lux Verbi-bloemlesing.

Die titel was glo eers Die mooiste Afrikaanse geestelike gedigte wat waarskynlik minder problematies is as die huidige titel wat Christelik is. En daar is, soos ons weet, ’n groot verskil tussen Christelik en geestelik.

Die nuwe titel maak opnames van M.M. Walters, Wilma Stockenström en Daniel Hugo problematies. Laasgenoemde bely op Versindaba dat hy ja gesê het vir ’n titel met ’n geestelike inslag, maar nie Christelik nie. Hy skryf:

“Ek het gedigte tot hierdie bloemlesing bygedra toe die werktitel nog was: ‘Die mooiste Geestelike gedigte in Afrikaans’. By publikasie blyk dit nou dat die “Geestelik” in “Christelik” verander is. Ek voel mislei deur die samesteller en uitgewer, aangesien ek myself beslis nie as ’n Christelike digter beskou nie.

’n Groot soetkys

Waar sake verder kompliseer, is wanneer ’n mens Cas Vos se voorwoord lees. (En nota bene, N.P. van Wyk Louw in die register word onder Van Wyk Louw geplaas en nie onder Louw nie. Maar dit as tersyde.) Vos verwys na Orhan Pamuk se bekende “My father’s suitcase” (2007), sy Nobellesing, om sy keuse van “Landskap van die reis” te regverdig. Pamuk se uiters komplekse voordrag verloor hier resonansie.

Vos se uitasem voorwoord is so aanvegbaar dat ’n mens nie weet waar om te begin nie. Hoe enige kundige leser Wilma Stockenström se “Die ballade van die bitterarm dood” en “So ook maar maaksel” as Christelik kan lees, is verbysterend. D.J. Opperman se “Paddas” is eweneens opgeneem. Ek haal aan:

“D.J. Opperman se voortreflike gedig ‘Paddas’ handel oor die plae in Egipte: meer spesifiek, oor die stortvloed reën wat die ‘tortels van die modder’ oral laat toeslaan, van sloot tot kombuis. Hulle staan in God se diens om sy volk te bevry. Daarom roep hulle ‘op Hom die groot hosannas’.”

Olga Kirsch se opname word verdedig, onder meer omdat die Ou Testament ook ’n boek vir en van die Christen is (17). Hoe klop dit egter met die titel van die bloemlesing?

Hy skryf verder: “Al is al die gedigte nie streng gesproke Christelik nie, is dit weldeeglik versoenbaar met Christelike oortuigings . . .”

Die feit dat Pasolini ’n rolprent oor Jesus gemaak het, maak nog lank nie van hom ’n Christen nie.

Ons Boeddhis Breyten Breytenbach staan ook in die inleiding (al is daar nie ’n gedig opgeneem nie) soos Ernst van Heerden se siektevers “Aan die verhuisingsmanne”.

Die finale gevoel wat hierdie bundel laat, is dat die samesteller enigiets in hierdie groot soetkys sal insmyt. Van ’n tandeborsel tot Sunlight-seep. Ou klere tot nuwes. Lina Spies en Loftus Marais.

Ek is tans besig met ’n bloemlesing Vreemde liefde oor lesbiese verse en ek dink ek gaan een van Cas Vos se verse opneem.

“Op ons reis is ons nie alleen nie. God is met ons op pad na die nuwe Jerusalem,” staan daar geskryf.

Gaan plaas hierdie bloemlesing neffens C.J.M. Nienaber en M. Nienaber-Luitingh se Die braambos brand (1987) en F.I.J. van Rensburg se Jubilate! Loofgedigte in Afrikaans (1995) en dan wonder ’n mens oor die doelstelling van hierdie antologie.

Is daar werklik kundig gelees en nagedink?

Bernard Odendaal en Marlies Taljard het die uitgewer van raad bedien. Het hulle die finale manuskrip gesien? En die nota van die uitgewer dat hulle probeer het om almal op te spoor, maar dit was nie moontlik nie? In die dae van e-pos, Facebook en telefone?

Ek is tans besig met ’n bloemlesing Vreemde liefde oor lesbiese verse en ek dink ek gaan een van Cas Vos se verse opneem. Uiteraard sonder toestemming. So laat ons nie jakkalsdraaie gooi of vosserig raak nie; ’n Christelike gedig is nie net sommer ’n gedig wat geloof aanroer of dit kritiseer nie.

En om te kumbaya met komplimente soos “voortreflik” help gewis nie om ’n slordige, oorhaastige keuse te regverdig nie.

* Prof. Hambidge is professor in Afrikaans en kreatiewe skryfwerk aan die Universiteit van Kaapstad.

Marga Stoffer, NB se uitgewersbestuurder, reageer namens Lux Verbi:

N.a.v. die kwessie oor toestemming: Sommige digters is genader om toestemming te verleen, maar ons het nie vir almal toestemming gevra nie. Soos Joan noem, is dit nie ’n vereiste nie maar ’n hoflikheidsgebaar om dit te doen in die gevalle waar NB (waarvan Lux Verbi deel is) die regte bestuur.

Ek vra dus om verskoning dat ons nie vir almal toestemming gevra het nie. En ja, ten spyte van e-pos, Facebook en selfone was daar inderdaad enkele digters en/of digters se erfgename wat ons nie kon bereik nie of van wie ons geen reaksie ontvang het nie.

Dit is, dink ek, relevant om op rekord te stel dat twee letterkundiges die finale samestelling noukeurig beoordeel het.
Marga Stoffer

Ek is reeds in Rapport aangehaal oor die titelverandering en herhaal: Die werkstitel was aanvanklik “Die mooiste Afrikaanse Christelike gedigte”, ons het ’n ruk lank met die werkstitel “Die mooiste geestelike gedigte in Afrikaans” gewerk, en toe het ons teruggegaan na die oorspronklike titel.

Lux Verbi (met sy lang en trotse tradisie as Christelike uitgewer) het beslis nooit beplan om enigiemand met ’n slapriem te vang om teen hulle sin in ’n Christelike werk opgeneem te word nie. 

Dit is, dink ek, relevant om op rekord te stel dat twee letterkundiges die finale samestelling noukeurig beoordeel het. Hulle het ook verdere gedigte voorgestel en dié gedigte is toe inderdaad ook in die bloemlesing opgeneem.

besig om te laai... Regstreeks
South Africa A 268/10 & 196/1
India A 276/10
besig om te laai... Regstreeks
Australia 193/3
England 147/10
Inperking vir
DAE
URE
MIN
Rand - Dollar
15.73
-0.1%
Rand - Pond
20.79
-0.3%
Rand - Euro
17.83
-0.1%
Rand - Aus dollar
11.28
-0.2%
Rand - Jen
0.14
-0.2%
Goud
1,785.99
+0.2%
Silwer
22.44
+0.1%
Palladium
1,867.47
+0.6%
Platinum
960.04
-0.1%
Brent-ruolie
75.82
+0.5%
Top-40
65,993
0.0%
Alle aandele
72,404
0.0%
Hulpbronne 10
68,624
0.0%
Industriële 25
95,800
0.0%
Finansiële 15
14,289
0.0%
Alle JSE-data is met minstens 15 minute vertraag Iress logo
Blitsblik op ’n maatskappy

Volg die maatskappy se aandeelprys en lees nuwe Sens-verklarings en resultate hier.

Verkeer in jou area

Kies 'n area om verkeersvoorvalle op jou roete te sien.

Klik om te stel
Nuuswenke

Het jy 'n nuuswenk of storie wat jy graag met Netwerk24 wil deel? Stuur gerus 'n e-pos aan ons nuusspan.

Stuur 'n e-pos