Wat hou die toekoms vir Afrikaans op hoëronderwysvlak in, vra Leopold Scholtz ná die onthullings oor die druk op Afrikaanse studente aan die Universiteit Stellenbosch.
Die verloop van die taalpolitieke stryd aan histories Afrikaanse universiteite sedert die intrede van die nuwe politieke bedeling in 1994 het deur verskeie fases gegaan waarin die verengelsingsproses onherroeplik verder gevoer is.
Die oorgang tussen die fases is telkens gekenmerk deur die bereiking van ’n kantelpunt. Elke keer as só ’n kantelpunt bereik is, het dit onmoontlik geblyk om dit om te keer; die momentum was eenvoudig te groot.
