Daar is drie dinge in die onderwys wat my woedend maak. ’n Kind wat onregverdig behandel word, te na gekom word en ’n kind wat ’n eie lewe beëindig weens die onbehoorlike druk van ons land se skoolstelsel.
Knap voor die bekendmaking van die matriekuitslae van 2022 beëindig ’n pragtige jong matriekmeisie haar eie lewe omdat sy vas geglo het sy het wiskunde gedruip. Soos alle ander kinders moes sy ook waarskynlik elke dag hoor dat sy ná skool sonder wiskunde geen toekoms- of lewensverwagting het nie.
Toe die bedroefde ma haar kind se matrieksertifikaat ontvang, lees ons almal die kind het 51% vir wiskunde behaal. Dink net hoe dit moontlik die kind se gemoedstoestand en lewensuitkyk onherroeplik en ten goede kon verander het.
