Enoch Godongwana, minister van finansies, se voorstel dat huishoudings wat ná 1 Maart sonpanele installeer ’n belastingkorting van hoogstens R15 000 kry, is op die oog af goeie nuus. Dit gaan Eskom wel nie red nie.
Eerstens: Eskom is reddeloos. Diefstal, korrupsie, sabotasie, swak ontwerp, swak vakmanskap, swak instandhouding, ensovoorts, maak redding onmoontlik. Tweedens, sonpanele is duur en help op sigself niks nie. ’n Mens het ’n wisselrigter (inverter) en batterye ook nodig.
Die koste van ’n stelsel om ’n kleinerige huishouding van sonkrag te voorsien, sal tussen R120 000 en R150 000 wees. Min huishoudings kan dit bekostig. Die minister sou meer bereik het as hy belastingkorting gegee het aan mense wat ’n sonwaterverwarmer (geiser) installeer.
