Onsin. Uit die duim gesuig. Dit is woorde wat Patrick Tariq Mellet se bewerings oor skeepsdiens in Tafelbaai in sy onlangs verskene The Lie of 1652 (Tafelberg) by my oproep.
Ek bepaal my by ’n bespreking van die boek se titel, sake daarmee verwant en die skrywer se werkswyse. Die titel skep groot verwagting, niks minder nie as ’n belangrike nuwe bydrae tot internasionale historiografie. Dit beloof ’n korreksie op die datum 1652, Van Riebeeck se datum. Die eintlike teiken is Van Riebeeck en dit waarvoor hy onthou word.
Die teks begin en eindig met outobiografiese mededelings deur die outeur. Subjektiwiteit is dus moontlik. Die boek bevat geen bibliografie nie. Daar is verskeie bladsye met eindnotas, waarin die name Leibbrandt en Schoeman (wees gewaarsku) as bronne volop voorkom, maar geen teken van primêre argivale bronne met nuwe inligting nie.
