Terwyl ek hier sit en skryf, is die Springbokspan in Japan vir die Wêreldbekertoernooi. Onder ’n wolk.
Daardie wolk is, weer eens, rassisme. Eben Etzebeth word beskuldig van ’n kru rassistiese geskel op ’n “anderskleurige”. Ek hoop van harte dit is ’n vals beskuldiging en dat die Stormers en Bokke se reus sy amper onontbeerlike rol in die toernooi sal kan speel.
Tegelyk kan jy slegs jou hande saamslaan oor die skynbaar meedoënlose terugkeer van rassistiese insidente (werklik en na bewering). As dit nie Penny Sparrow is nie, is dit Angelo Agrizzi. As dit nie Henry Tromp is nie, is dit Steve Hofmeyr. Dit hou net nie op nie.
