Ons is nie geroepe om alles in die lewe te verstaan of te verklaar nie. Ook skuld ons nie antwoorde aan almal oor elke denkbare geloofsvraag, probleem of krisis nie. Daarom verval ons nooit in oorhaastige clichés soos dat onverklaarbare dinge deel van God se geheimsinnige werke is nie. God is nie ’n geheimenis nie – in elk geval nie in die sin dat Hy totaal onbegryplik en onkenbaar is nie. God het Homself genoegsaam bekend gemaak in die Bybel. Sy wil is ook nie in geheimhouding gehul nie. Jesus self beliggaam sy wil. Hy voer dit ook uit, soos wat Hy self leer in Johannes 6:38-40.
God is kenbaar, dienbaar en verstaanbaar. Ja, natuurlik is Hy groter, heiliger, sterker, liefdevoller en genadiger as alles wat ons van Hom weet. Nooit kan ons die Here vasvang in ons eie klein verstand of in ons idees en woorde nie. Maar ons weet ook Hy is nie anders as hoe Hy Homself in die Bybel bekend maak nie. God het nie verskuilde kante nie. Hy is altyd wie Hy is
