Vonke spat: Inwoners van Jeffreysbaai is vol afwagting oor die stadsraadsvergadering wat vanaand op dié dorp gehou sal word. Seker een van die belangrikste besprekingspunte in die geskiedenis van die raad word vanaand afgehandel. Dit is die probleem van die onlangse taalkwessie wat die raad in twee groepe verdeel het.
Groen erfenis: Sowat 10 000 bome gaan vanjaar, met die Groen Erfenis-veldtog, aan skole en nywerhede beskikbaar gestel word, het mnr. John Shelton, direkteur van parke en ontspanning van Port Elizabeth se stadsraad, gesê. Inwoners van Port Elizabeth kan soos gewoonlik ook hibiskus- en karlienbome van dié afdeling ontvang. “Ons het tussen 8 000 en 10 000 bome beskikbaar en dit sal mettertyd aan die verskillende skole en nywerhede gegee word,” het mnr. Shelton gesê.
Vrouesokkerspan: Port Elizabeth se vrouesokkerspan – die Nikker Elf – het die naweek hul eerste wedstryd met 5-3 gewen. Hulle is nou slaggereed vir hul eerste groot wedstryd teen die Claremont Demons van Kaapstad. Karin Steffen en Colleen McGwenne het elk twee doele aangeteken en Rhona Strydom ’n strafdoel. Sowat 200 toeskouers het om die veld gesit.
