Voorbladfoto-byskrif: Niks is lekkerder as om ’n paar dae lank nie hoef skool toe te gaan nie. Mark Langton (12) geniet die ongevraagde “vakansietjie” in die hospitaal ná ’n voorval gister by sy huis. Mark is die seun van mnr. en mev. R.L. Langton van Shortweg 91, Walmer. Mark en ’n vriend, Adrian Diamond, het buite met sy pa se boot gespeel toe sy voet gly. Hy het van die boot, wat op ’n slaapwa was, afgeval en albei sy gewrigte en sy linkerhak gekraak. Mark was vandag vol glimlagte en sê hy voel amper nie die pyn nie. By hom is verpleegster Eunice Markotter.
Groot skade: Mnr. J.F. Vermaak, ’n groot voëlboer van Despatch, het die naweek honderde rand skade gely toe by sy voëlhokke ingebreek is. ’n Ruk daarna het ’n onbekende sy dogter gebel en gedreig dat die volgende aand weer by hom ingebreek sou word. Mnr. Vermaak is een van die grootste voëlboere in Suid-Afrika en is landwyd bekend vir sy duiwe en verskillende soorte kwartels.
Aansteeklike siektes: Altesame 218 gevalle van aansteeklike siektes is in Januarie vanjaar in Port Elizabeth aangemeld, teenoor 188 verlede Januarie, lui ’n verslag van die stadsgesondheidshoof aan die gesondheidskomitee, wat vanmiddag vergader het.
