Ek skryf oor die gereelde verkeersopeenhoping in Stellenbosch, en veral op die R44, wat van Klapmuts af tot in Somerset-Wes strek.
Ek was ’n paar jaar gelede baie opgewonde toe ek in die koerant lees van ’n meesters- of doktorale ingenieur-student by die Universiteit Stellenbosch wat ’n model ontwerp het sodat verkeersligte beter kan sinkroniseer. Ek wonder nou wat van hierdie projek geword het, want gereeld, as ek byvoorbeeld van Paradyskloof na Cloetesville ry, stop ek menigmaal by elke verkeerslig, en veral daardie drie wat so naby aan mekaar in Adam Tasweg, Alexanderstraat, die Plankenbrug-ingang en Merrimanlaan is. Is hierdie sinkronisasiestelsel ooit ingestel, of het die verkeersdepartement die handdoek ingegooi?
Ek kan nie nalaat nie om die afdeling wat paaie in Stellenbosch ontwerp geluk te wens met merkwaardige verbeterings, soos by die Dalsig-verkeerslig, Paul Roos-KwikSpar en ’n paar klein verkeersirkels. Dit bespaar motoriste oneindige frustrasie. Baie dankie.
Bennie van Eeden
STELLENBOSCH
