Doodgewone aptekers wat hul klante van hul mediese voorskrifte voorsien was onaangenaam verras toe drie rowers vroeër vandag (Donderdag 16 Maart) op die Drakenstein-apteek in Paarl toesak.
Die Paarl-polisie se woordvoerder, kapt. Louise du Plessis, het die besigheidsroof by die Drakenstein-apteek by 55 Van Riebeeck-rylaan om ongeveer 13:00 bevestig.
“Die apteek was vroeër vandag (Donderdag) deur drie gewapende mans bestorm. Die rowers het met ’n bedrag kontant van die toneel af gevlug.”
Sy sê die hoeveelheid kontant wat gesteel is, is nog nie bekend nie. Geen beserings in verband met die voorval is aan Paarl Post bekendgemaak nie.
“Daar is nog baie besonderhede rakende die voorval wat bevestig moet word,” noem Du Plessis ten slotte.
Enige iemand met enige leidrade of inligting rakende die rooftog by Drakenstein-apteek in Jan Van Riebeeck-rylaan het, word gevra om die Paarl-polisie te skakel by 021 807 4141 of 021 807 4015.
