Die gemeenskap van Bonnievale is in rou gedompel nadat ’n geliefde inwoner op Vrydag 17 Februarie na bewering deur haar ekskêrel vermoor is.
Nelnishia “Niesie” Kortjé (36) het omstreeks 05:00 van haar huis in Protealaan, Happy Valley, werk toe gestap toe haar gewese kêrel haar in die straat voorgekeer het. Volgens ’n bron na aan Standard het die man met Kortjé begin baklei, waarna hy aggressief geraak en haar fisiek begin aanrand het. Kortjé se ma het die struweling gesien en wou tussenbeide tree. Hy het ’n mes uitgepluk en Kortjé veelvuldige steekhoue toegedien. Haar ma het na bewering alles gedoen om hom te keer, maar sy is met dieselfde mes gedreig waarmee haar dogter pas voor haar doodgesteek is.
Die man het dadelik van die toneel af gevlug.
Die gewese paartjie het ’n 10 maande oue baba saam.
Volgens AO. Meryll Africa van die Bonnievale-polisie, het lede met hul aankoms die slagoffer op haar rug in Protealaan aangetref.
“Sy was met ’n rooi kombers bedek. Die slagoffer se gesig was vol bloed en ons het verskeie steekwonde in haar gesig opgemerk. Die ambulans het kort daarna opgedaag en die slagoffer is op die toneel dood verklaar.”
By verdere ondersoek is ontdek die verdagte het die slagoffer verskeie kere in haar gesig, nek en bors gesteek.
“Die verdagte, ’n 36-jarige man, is na ’n kort soektog opgespoor en in hegtenis geneem. ’n Klag van moord word ondersoek,” het Africa bygevoeg.
Standard het na ’n familielid van Kortjé uitgereik, maar is vir eers kommentaar geweier.
Standard verneem egter dat die gemeenskap van Happy Valley ná hierdie voorval briesend is en dat inwoners kragte saamgespan het om die man op te spoor.
“Hulle het die man binne ’n paar uur ná die voorval gekry. Hy weet dat hy nooit weer sy gesig in die gemeenskap sal kan wys nie,” het die bron bygevoeg.
Boodskappe van skok en medelye is wyd op sosiale media gedeel.
“Vanoggend word die gemeenskap wakker met die nuus van Niesie, wat haar lewe verloor het aan die hand van ’n sinnelose gruweldaad. Ons as gemeenskap voel die hartseer en pyn saam met haar kinders, die breë familie, vriende en kollegas. Mag God julle die vertroosting bring. Mag Hy die seer kom genees. Weet dat julle in ons almal se gebede is,” het Patricia Niemand geskryf.
Kortjé sal in die komende week ter ruste gelê word en haar vermeende moordenaar sal binnekort in die plaaslike hof verskyn.
