Die Worcester Perseverance-rugbyklub het Saterdag (25 Februarie) die Piet Buys-wisseltrofee verower nadat dié begeesterde span die 2021-kampioene, De Doorns United, oortuigend geklop het.
Die wedstryd het teen ’n geweldige tempo begin met Persies die aanvallende span. De Doorns se verdediging het gehou en hy het stelselmatig beheer oor die wedstryd begin oorneem toe hy die eerste sewe punte aangeteken het.
Daarna het De Doorns weer met mening aangeval en nog ’n drie gedruk, maar die doelskop was mis (telling 12-0 vir De Doorns).
In die tweede helfte het die Persies met goeie aanvallende taktiek gespeel en is met ’n verdoelde drie beloon, wat die telling op 12-7 gebring het.
Met die inskop daarna het die Persies weer eens goeie rugby gespeel en nog ’n drie gaan druk, wat die telling na 12-14 in Persies se guns geswaai het.
’n Paar minute later het Persies sy derde drie gaan druk – en suksesvol oorgeskop – wat die telling 12-21 gemaak het.
De Doorns het egter nie gaan lê nie en het Persies met mening aangeval. De Doorns kry toe ’n strafskop en die telling verander na 21-15 – steeds in Persies se guns.
En om die laaste spyker in die doodskis te kap, het Persies in die doodsnikke van die wedstryd nog ’n drie gedruk en die stryd 26-15 gewen.
