Gebroke harte is nie net die naam van ’n geliefde en gewilde Turkse telenovela met Afrikaanse stemme nie. Dis ook hoe duisende Suid-Afrikaners regtig voel oor hierdie eksotiese stories uit Turkye waarvoor duisende mense daagliks vasgenael sit, sedert die skokkende reeks aardbewings verlede maand waarin reeds meer as 52 000 mense teen druktyd dood is.
Het jy geweet dis die dodelikste aardbewings in die geskiedenis van Turkye sedert die jaar 526? Suid-Afrikaners het soveel medelye met dié mense omdat hulle en hul stories die laaste paar jare soos ons eie geraak het. Turkse telenovelas wys die afgelope vyf jaar sedert 2018 in Afrikaans op e.tv, asook Openview se eExtra- en ePlesier-kanale.
Sedert Julie laasjaar is Turkse telenovelas in lekker Afrikaans ook op DStv se kykNET & kie-kanaal te sien. Op die oomblik kyk Suid-Afrikaners na Daai Crazy Somer, #DisComplicated, Die Vertroueling, sowel as Elif en Verdeelde Liefde op e.tv, eExtra en ePlesier. Op kykNET & kie is mense tans in vervoering oor In die Ysterhand se Greep en Kind van die Noodlot.
