Winter is op ons en dis tyd om in te spring en jou huis ’n slag behoorlik skoon te maak sodat jy teen die lente nie soveel spring cleaning hoef te doen nie. Hier is ’n paar handige wenke om jou huis nou al silwer-skoon te kry . . . en skoon te hou!
Kyk deur jou kaste en laaie vir items wat te klein is, of wat jy nie meer dra of gebruik nie. Klere wat nog in ’n goeie toestand is, kan natuurlik weggegee word of selfs verkoop word om ’n ekstra geldjie te verdien, maar toiingrige T-hemde en ou handdoeke met gate of vlekke kan vir ’n ander doel aangewend word. Gebruik dit om vloere, vensters, mure, die bad en ander oppervlakke mee af te vee.
Is jou ruite vol van die kinders se vingerafdrukke, of hond- en katsnoetmerke? Meng 250 ml (1 koppie) water, 250 ml (1 koppie) asyn en 1 druppel opwasmiddel in ’n spuitbottel. Spuit dit aan jou ruite en vee dit met koerantpapier af. Die opwasmiddel help strepe voorkom terwyl die geur daarvan die reuk van die asyn wegsteek. Koerantpapier absorbeer olie en vloeistof beter as kombuispapier, wat gewoonlik strepe laat.
