Die appèlhof in Bloemfontein het ’n stokkie gesteek voor die Nasionale Kunsteraad se poging om hom los te wikkel uit ’n kontraktuele verpligting wat hom R8 miljoen uit die sak gaan jaag.
Die kunsteraad het hom tot dié hof gewend om te appelleer teen die hooggeregshof in Johannesburg se beslissing in Junie vanjaar dat die kunsteraad R8 miljoen se noodfinansiering aan die Nasionale Kunstefees (NAF) in Makhanda moet betaal omdat die kunsteraad dié bedrag in ’n kontrak aan die feesbestuur belowe het.
Die kunsteraad het dié bedrag in Januarie aan die NAF toegeken nadat die raad R300 miljoen se noodfinansiering danksy die presidensiële stimulusprogram vir werkskepping (PESP) ontvang het.
