Soos in sy lewe en loopbaan is Anton Goosen in sy biografie prakties en takties in sy gevegsbenadering: Hy het gewag dat almal hul sê sê en nou wys hy saam met Hanlie Retief hulle op hul foute, maar hy verwoord ook dinge wat jy nooit geweet het jy voel nie, skryf Deon Maas.
Anton Goosen: Liedjieboer deur Hanlie Retief. Uitgewer: Tafelberg. Prys: R290.
As appelplukkers en prostitute die mensdom se eerste werknemers was, glip biograwe sekerlik maklik in die derde plek. Hofnarre en troebadoers wat eeue gelede hul koning se lof ver buite die grense van sy koninkryk moes gaan besing, het soms die waarheid gepraat en soms ’n bietjie hype ingegooi, maar vir Jan en alleman was dit altyd fassinerend.
