Die dramaturg en digter Dianne Du Toit Albertze se debuutroman, wat oor ’n “vuilbek meisiekjeent” handel, is onlangs uitgereik en sy dra dit op aan al die “transgender en gender nonconforming niggies”, skryf Rafiek Mammon.
Daar is ’n nuwe boek wat smag vir ’n plekkie op ’n bedkassie. Die boek: Dianne Du Toit Albertze se debuutroman, Bottelnek breek bek. Gewring vanuit ’n unieke stem en ’n vlymskerp tong soos wat Albertze al soveel keer in haar vroeër teaterwerke aan ons gelewer het: outentiek, vars en kreatief.
Bottelnek breek bek is ’n poespas van prosa, poësie en drama, amper teatraal in styl, deurdrenk met elemente van satire, kabaret en magiese realisme. Albertze beskryf dit as: “Vol klappende hoëhakskoene en skrouende liefdesliedjies, maar moenie dink dis ’n moffiekonsert nie, want nie een van die vertellers draai doekies om nie. Elkeen praat sy/haar/hul waarheid en het nie die tyd om te preek nie.”
