Martie Preller, skrywer van die gewilde Babalela-kinderboeke, is Sondagaand in die ouderdom van 75 oorlede.
“My ma het aan demensie gely en was in die George and Annie Stark-tehuis in Belville. Haar gesondheid was heel goed, so haar afsterwe is ’n taamlike skok vir ons. Sy het saggies in haar slaap heengegaan,” het haar dogter, Martie Kruger, by navraag aan Netwerk24 gesê.
Preller het in haar leeftyd meer as 50 kinderboeke geskryf, waaronder titels soos Anderkantland, ’n Haas moet doen wat ’n haas moet doen, en Jamie en Sebastiaan en die storiemol, wat sy saam met haar dogter geskryf het.
