Dié laaste besending nuwe leesstof vir 2020 is perfek om in die Kerskous van jonges te stop om die lang somersdae vermaakliker te maak.
Die Poolse bioloog Wojciech Grajkowski se boeiende teks oor die geskiedenis, mites, legendes, biologie en rol van onderskeidelik bome en bye asook die indrukwekkende illustrasies van Piotr Socha, een van dié land se gewildste illustreerders en strokiesprentkunstenaars, verhef Die boek van bome en Die boek van bye tot iets wat dié Kersfees in Afrikaanse kinders van sewe en ouer se Kerskous hoort. Hierdie ensiklopediese grootformaat-hardebandprenteboeke is al in meer as 25 tale uitgegee en met vele internasionale pryse bekroon. Al is dit gemik op jong lesers, sal “alle volwasse leunstoel-ontdekkers en natuurliefhebbers” volgens die uitgewer daarby aanklank vind. Uitgewer: Protea Boekhuis. Prys: R395 stuk.
Planetarium, die derde titel in die Welkom by die museum-reeks grootformaatboeke, sal kinders van nege tot 14 op ’n verstommende reis neem waarin ’n hele paar van die ruimte se geheimenisse – die sonnestelsel, son, naghemel, sterrestelsel en heelal – ontsluit word. Raman Prinja, skrywer van dié lieflike hardebandboek wat deur Burgert Behr in Afrikaans vertaal is, is ’n professor in astrofisika, maar hy weet hoe om dié komplekse onderwerp interessant en verteerbaar aan te bied, gerugsteun deur Chris Wormell se pragtige illustrasies. Uitgewer: Protea Boekhuis. Prys: R450.
